Vilalba Aberta volve saír ao paso das necesidades do rural. Logo dunha visita a Vilapedre, o noso Grupo Municipal vén de anunciar o rexistro dunha nova iniciativa demandando o arranxo de varios viais de titularidade municipal na parroquia.
Denunciamos o deplorable estado de pistas fundamentais para a veciñanza como a que une os barrios do Porto de Bois, A Fraga e o Pazo ou a que comunica a Carballeira e Rebordelo e urximos ao Concello a actuar, tamén, sobre a que enlaza Sarela co Castro, así como sobre o vial que vai do barrio da Bouza ao de Vigo.
“Estamos a falar dunha parroquia, durante anos, completamente esquecida polos gobernos do PP e que segue abandonada diante da abraiante inacción do goberno do PSOE”, censurou o noso voceiro municipal Modesto Renda.
Así, e ao tempo que contextualizou a iniciativa como “a enésima chamada de atención ao goberno en relación co estado da rede viaria municipal”, volveu apuntar á responsabilidade da Alcaldesa, así como á do edil de infraestruturas Luís Fernández Álvarez, en base ás “decenas de reclamacións e solicitudes veciñais sen contestar”.
Á parroquia, achegouse tamén a nosa vicevoceira municipal, Mª Xosé Fernández, quen ao tempo que agradeceu a confianza dos veciños de Vilapedre en Vilalba Aberta, apelou ao consenso de todos os grupos políticos con representación no Concello, con vistas a mudar unha realidade que “debera avergoñarnos coma representantes dos vilalbeses/as.”
