Dende a asemblea de Vilalba Aberta levaremos ao vindeiro Pleno Ordinario unha solicitude de comparecencia tanto do Alcalde coma da Concelleira de Feiras e Mercados, co fin de depurar responsabilidades logo de termos coñecemento dun episodio de venda ambulante de cans na feira do pasado día 4. Unha denuncia, xunto á cal adxuntaremos a conseguinte documentación gráfica onde, con toda claridade, se pode apreciar como o devandito intento de venda se levou a cabo no marco do mercado local e a plena luz do día sen que ningúen do Goberno nin das forzas de seguridade municipais fixeran nada para impedilo.
Na nosa argumentación, facemos especial referencia á Lei 4/2017, do 3 de outubro, de protección e benestar dos animais de compañía en Galicia. Unha Lei, que introduce novas disposicións en materia de comercio de animais, así como os requisitos para exercer a compravenda dos mesmos e en base á cal, o Goberno Municipal de Vilalba estaría sostendo, por acción ou omisión, a comisión de diferentes e graves infraccións.
Estamos a falar – sen perxuizo daquelas que se poidan detectar con posterioridade – das tipificadas no seu artigo número 38, relativas á exhibición dos animais de compañía destinados á venda en escaparates ou zonas expostas á vía pública ou a modo de reclamo comercial, ao mantemento dos animais en instalacións que non reúnan os requisitos previstos no artigo 9.e, á venda de animais domésticos fóra dos establecementos legalmente autorizados e ao transporte de animais en condicións inaxeitadas ou en maleteiros que non estean especialmente adaptados.
Neste senso a iniciativa, que dende Vilalba Aberta agardamos, supoña o inicio das actuacións oportunas para a apertura do preceptivo expediente sancionador polo incumprimento da normativa autonómica no relativo ao benestar dos animais no Concello de Vilalba.
