Vilalba Aberta ven facer público o rexistro dunha nova iniciativa de cara ao Pleno Ordinario de Xullo. A proposta, que tal e como explicou diante da prensa o noso Grupo Municipal, ten como obxectivo “rematar cos continuados atrasos administrativos, así como cos que día a día se producen na propia xestión dos servizos prestados polo Concello”, pretende, ao tempo, o “necesario reforzo e reorganización do persoal municipal e o obrigado estudo da duración e a tipoloxía da totalidade dos contratos.”
Os nosos representantes na corporación reclamarán, así, por segunda vez no que vai de lexislatura, que se desbloquee a elaboración dunha RPT (Relación de Postos de Traballo) que – lembran – “segue pendente, máis de dous anos despois do cambio de goberno”
O noso voceiro municipal, Modesto Renda, asegurou que “existen moitas razóns polas que o goberno local debe desbloquear a RPT, entre elas, cubrir as vacantes, a redefinición de postos actualmente desfasados ou a cobertura de novas necesidades derivadas da lóxica evolución administración”.
“Dende Vilalba Aberta queremos que a veciñanza de vila e parroquias conte con todos os servizos que mantén cos seus impostos, e que o Concello debe garantir, polo que entendemos que se deben superar as carencias causadas pola falta de persoal en intervención, urbanismo, administración xeral ou Policía Local entre outros”, remarcou.
Unha opinión compartida pola nosa compañeira e vicevoceira municipal, Mª Xosé Fernández, quen vinculou necesidade de aprobar a R.P.T coa “desexable xestión pública de servizos municipais privatizados polo PP, tales como o de limpeza nos colexios e instalacións municipais”.
Para Fernández, o que está a acontecer con este servizo non fixo máis que pór de manifesto o conxunto de eivas dun modelo de xestión “abertamente ineficaz”, así como a necesidade de “impulsar un cambio de paradigma que aposte pola xestión pública deste tipo de servizos”.
“A R.P.T é un instrumento organizativo que, máis alá de permitirlle ás administracións estruturar o persoal ao seu cargo, está pensada para facelo en función da necesidade dos servizos que teñan, o que abriría a porta á prestación directa de servizos actualmente privatizados e de aí tamén a nosa proposta”, apuntou.
